Sekretari amerikan i Mbrojtjes, Lloyd Austin, njoftoi një pako të ndihmës ushtarake për Ukrainën me vlerë deri në 6 miliardë dollarë, transmeton Anadolu.
“Unë jam i kënaqur të njoftoj sot një angazhim shtesë prej 6 miliardë dollarësh përmes Iniciativës sonë të Asistencës për Sigurinë në Ukrainë që do të na lejojë të prokurojmë pajisje të reja për Ukrainën nga industria amerikane”, tha Austin në një konferencë për media pas një takimi virtual të Grupit të Kontaktit për Mbrojtjen e Ukrainës.
“Kjo është pakoja më e madhe e asistencës për sigurinë për të cilën ne jemi përkushtuar deri më sot”, shtoi ai.
Pentagoni njoftoi të mërkurën një paketë të re armësh për Ukrainën, disa minuta pasi Biden nënshkroi ligjin për shpenzimet prej 95 miliardë dollarësh që financon prioritetet e tij të sigurisë kombëtare, duke përfshirë më shumë se 60.8 miliardë dollarë për Ukrainën.
Sipas një deklarate, pjesa e parë e ndihmës vlerësohet deri në 1 miliard dollarë dhe përfshin raketa të mbrojtjes ajrore RIM-7 dhe AIM-9M, raketa anti-ajrore Stinger, armë të vogla dhe municione shtesë për to, duke përfshirë predha të kalibrit 0,50 për të luftuar dronët.
