RTV AHIRETI
LajmeRajon dhe Botë

SHBA përshpejton dërgimin e sistemeve të mbrojtjes ajrore NASAMS në Ukrainë

shba-pershpejton-dergimin-e-sistemeve-te-mbrojtjes-ajrore-nasams-ne-ukraine

Shtetet e Bashkuara po përshpejtojnë dërgimin e sistemeve të sofistikuara të mbrojtjes ajrore NASAMS në Ukrainë, tha të martën zëdhënësi i Këshillit të Sigurisë Kombëtare të Shtëpisë së Bardhë, John Kirby, pas breshërisë së goditjeve me raketa nga Rusia në ditët e fundit.

Presidenti amerikan Joe Biden i premtoi Presidentit të Ukrainës Volodomyr Zelenskiy në një telefonatë të hënën se Shtetet e Bashkuara do të mbështesin mbrojtjen ajrore të vendit të tij, ndërsa ukrainasit qëndronin në strehime për t’u mbrojtur nga sulmet në Kiev.

Shtetet e Bashkuara kanë miratuar deri më tani dërgimin në Ukrainë të tetë sistemeve të avancuara kombëtare të raketave tokë-ajër (NASAMS). Dy pritet të dorëzohen së shpejti dhe gjashtë të tjera në një periudhë më të gjatë kohore.

“Mendojmë se dy të parët do t’i çojmë atje në të ardhmen shumë të afërt,” tha zoti Kirby gjatë një konference për gazetarët. “Natyrisht jemi të interesuar të përshpejtojmë dërgimin e sistemeve NASAMS në Ukrainë sa më shpejt që të mundemi.”

Shtetet e Bashkuara kanë ofruar më shumë se 16.8 miliardë dollarë ndihmë për sigurinë që kur Rusia filloi agresionin ndaj Ukrainës më 24 shkurt dhe kanë vendosur një sërë sanksionesh ekonomike ndaj Moskës për veprimet e saj në Ukrainë. /voa

Related posts

Bie Qeveria e Sllovakisë

admin

Përmbytjet në Iran, shkon në 80 numri i të vdekurve

admin

Lajçaku flet për takimet me Kurtin dhe Vuçiqin: Marrëveshjet të zbatohen pa vonesë

rezart morina