Ambasada e Shteteve të Bashkuara në Arabinë Saudite ka përditësuar këshillën e udhëtimit dhe u ka kërkuar qytetarëve amerikanë të rishqyrtojnë udhëtimet në këtë vend për shkak të rrezikut nga sulmet me dronë dhe raketa, kërcënimeve nga Huthit dhe faktorëve të tjerë të sigurisë.
Në njoftim thuhet se ekziston rreziku i sulmeve iraniane me dronë dhe raketa ndaj interesave amerikane në Arabinë Saudite. Gjithashtu përmenden kërcënimet nga Huthit në Jemen, të cilët SHBA-ja i konsideron të mbështetur nga Irani.
Ambasada u kërkon qytetarëve amerikanë të mos udhëtojnë në zonën pranë kufirit me Jemenin për shkak të rrezikut nga terrorizmi dhe konflikti i armatosur. Punonjësit e qeverisë amerikane nuk lejohen të udhëtojnë brenda një distance prej 32 kilometrash nga kufiri me Jemenin.
Njoftimi përmend gjithashtu qytetin lindor të Katifit, ku udhëtimet për arsye jo thelbësore janë të kufizuara për shkak të rreziqeve të sigurisë.
Ambasada paralajmëron se mbetjet nga dronët dhe raketat e interceptuara mund të paraqesin rrezik për civilët. Sipas saj, qytetarët amerikanë që jetojnë ose punojnë pranë objekteve energjetike dhe bazave ushtarake mund të përballen me rrezik më të madh.
SHBA-ja paralajmëron gjithashtu për kufizime të mundshme në largimin nga Arabia Saudite për personat që janë subjekt i hetimeve ose çështjeve gjyqësore. Në njoftim thuhet se autoritetet saudite mund të ndalojnë persona për postime në rrjetet sociale ose aktivitete në internet që konsiderohen kritike, fyese apo që cenojnë rendin publik. /mesazhi
