Sekretari i Përgjithshëm i Ligës Arabe, Ahmed Aboul Gheit, deklaroi se rezoluta e Këshillit të Sigurimit për t’i dhënë fund luftës në Rripin e Gazës shënon fillimin e një rruge që duhet të çojë drejt krijimit të shtetit palestinez.
Në një deklaratë, ai theksoi se në muajt në vijim do të nevojitet punë e gjerë në të gjitha nivelet për të kthyer elementet e rezolutës në rezultate konkrete për popullin palestinez. Sipas tij, dokumenti pasqyron angazhimin ndërkombëtar për rindërtimin e Gazës, e cila ka pësuar shkatërrim të paprecedentë.
Aboul Gheit vuri në dukje se rezoluta përmban edhe një referencë të rëndësishme për një rrugë të besueshme drejt krijimit të shtetit palestinez. Ai shprehu shpresën që të gjitha palët që mbështesin zgjidhjen me dy shtete të bashkojnë forcat për të bërë hapa të prekshëm drejt pavarësisë palestineze dhe për t’i dhënë fund okupimit izraelit, të cilin e cilësoi si burimin kryesor të paqëndrueshmërisë në rajon.
Ai shtoi se pret që së shpejti të nisë zbatimi i fazës së dytë të planit 20-pikësh dhe se rezoluta e re duhet të sigurojë që pushtuesi të lejojë hyrjen e ndihmave humanitare dhe materialeve të domosdoshme për procesin e rindërtimit. /mesazhi
