Ministri izraelit i Mbrojtjes Yoav Gallant tha sot se ka filluar një “fazë e re” e luftës, raporton Anadolu.
“Ne jemi në fillimin e një faze të re në luftë – kjo kërkon guxim, vendosmëri dhe këmbëngulje”, tha Gallant para ushtarëve në qytetin verior Haifa.
“Qendra e gravitetit po zhvendoset në veri duke devijuar burimet dhe forcat”, tha ai.
Gallant nuk foli mbi shpërthimet e fundit të pajisjeve elektronike në Liban, por ai vlerësoi punën e ushtrisë dhe agjencive të sigurisë dhe tha se “rezultatet janë shumë mbresëlënëse”.
Ai pretendoi se qëllimi i ofensivës në veri është të sigurojë që qytetarët që janë evakuuar të mund të kthehen të sigurt, duke shtuar se qeveria nuk i ka harruar robërit izraelitë në Gaza.
Në 24 orët e fundit në të gjithë Libanin, pas shpërthimeve të pajisjeve “pager”, shpërthime të ngjashme ndodhën sot në pajisjet e radio-komunikimit.
Ndërsa zyrtarët libanezë e konsiderojnë Izraelin përgjegjës për shpërthimet, nuk ka pasur asnjë koment nga Izraeli për shpërthimet, por Hezbollahu është zotuar të hakmerret kundër Izraelit.
Shpërthimet e pajisjeve “pager” erdhën në mes të përshkallëzimit kufitar midis Izraelit dhe Hezbollahut, të cilët janë përfshirë në luftë ndërkufitare që nga fillimi i luftës vdekjeprurëse të Tel Avivit në Rripin e Gazës, e cila ka vrarë mbi 41.000 njerëz, kryesisht gra dhe fëmijë, pas një sulmi nga Hamasi më 7 tetor të vitit të kaluar.
