Sekretari i përgjithshëm i Kombeve të Bashkuara (OKB), Antonio Guterres, ka përshëndetur marrëveshjen e arritur nga palët për vazhdimin e Iniciativës së Drithërave të Detit të Zi, transmeton Anadolu Agency (AA).
“Përshëndes marrëveshjen e të gjitha palëve për të vazhduar Iniciativën e Drithërave të Detit të Zi, për të lehtësuar lundrimin e sigurt të eksportit të drithërave, produkteve ushqimore dhe plehrave bujqësore nga Ukraina”, tha Guterres në një postim në Twitter.
Guterres shtoi se iniciativa tregon rëndësinë e “diplomacisë së matur” në gjetjen e zgjidhjeve shumëpalëshe.
Më 22 korrik, Turqia, Kombet e Bashkuara, Rusia dhe Ukraina nënshkruan një marrëveshje në Istanbul për të rifilluar eksportet e drithërave nga tre porte ukrainase të Detit të zi, që u ndërprenë në muajin shkurt për shkak të luftës së Rusisë në Ukrainë.
Palët po negocionin për një zgjatje të mundshme përtej afatit të saj të 19 nëntorit.
Sipas OKB-së, që nga 1 gushti mbi 10 milionë tonë drithëra janë eksportuar nga Ukraina.
