Përleshjet e dhunshme kanë shpërthyer midis ushtrisë sudaneze dhe grupit paraushtarak të Forcave të Mbështetjes së Shpejtë (RSF) në kryeqytetin Khartoum, raporton Anadolu.
Sipas dëshmitarëve, zhurma shpërthimesh dhe armësh të rënda janë dëgjuar në jug të kryeqytetit Khartoum, ndërsa nga zona duket edhe tymi i ngritur në qiell.
Përleshje po ashtu u raportuan në disa zona të qytetit Omdurman, në perëndim të kryeqytetit Khartoum.
Avionët luftarakë u panë duke fluturuar në disa zona në qytetin Bahri, në veri të kryeqytetit, në mes të vendosjes së forcave të ushtrisë në qytet.
Deri më tani nuk ka raporte për viktima.
Që nga muaji prill, Sudani është shkatërruar nga përleshjet midis ushtrisë dhe RSF-së, në një konflikt që, sipas mjekëve lokal, mori jetën e të paktën 3 mijë civilëve dhe plagosi mijëra të tjerë.
Disa marrëveshje armëpushimi midis rivalëve ndërluftues, të ndërmjetësuara nga ndërmjetësit sauditë dhe amerikanë, nuk arritën t’i japin fund dhunës në vend.
Organizata Ndërkombëtare për Migracionin (IOM) vlerëson se rreth 3 milionë njerëz janë zhvendosur nga konflikti aktual në Sudan.
Sot, Egjipti organizon një samit të vendeve fqinje të Sudanit për të diskutuar mënyrat e zgjidhjes së konfliktit atje.
