Pas një bllokade ruse në Këshillin e Sigurimit të OKB-së, Siria do të lejojë OKB-në të vazhdojë dërgimin e ndihmave humanitare nga Turqia në zonat e kontrolluara nga rebelët e vendit, ndërkohë që vendi është përfshirë në një luftë civile prej më shumë se një dekade.
Ambasadori sirian në OKB, Bassam al-Sabbagh i shkroi organit më të fuqishëm të Kombeve të Bashkuara, ku i thotë se ”qeveria siriane ka vendosur t’i japë leje Kombeve të Bashkuara dhe agjencive të saj për të përdorur pikën kufitare Bab al-Hawa”.
Ditët e fundit, miliona personave në Sirinë Veriperëndimore u janë ndërprerë furnizimet, pasi Rusia vuri veton ndaj një zgjatjeje nëntëmujore të mekanizmit në Këshillin e Sigurimit.
Një kundërpropozim nga Moska, i cili do të kishte parashikuar një zgjatje gjashtëmujore, gjithashtu dështoi.
Rusia është një nga aleatët më të ngushtë të qeverisë siriane. /atsh