Kancelari gjerman Olaf Scholz ka mohuar sërish që të ketë ndihmuar një bankë të madhe të shmangë kthimin e miliona taksave, kur ai ishte kryebashkiak i Hamburgut.
“Unë nuk kam pasur asnjë ndikim në procedurat tatimore të Bankës Warburg. Nuk ekziston as treguesi më i vogël që të kem dhënë ndonjë garanci”, tha Scholz kur u mor në pyetje për herë të dytë nga një komision deputetësh të premten, shkruan DW.
Marrja në pyetje është pjesë e një hetimi nga Komisioni i Hamburgut për mashtrimin tatimor “cum-ex”, i cili i ka kushtuar qeverisë miliarda.
Hetimet
Scholz ka qenë në krye të bashkisë së Hamburgut deri në vitin 2018 dhe ka nisur kontrolli i email-ve që nga 1 janari i 2015-s.
Gjithçka bëhet në kuadër të hetimeve mbi skandalin e njohur si “Cum-ex”, me prokurorët që po përpiqen të zbardhin se si ka ndikuar klasa e atëhershme politike, në nëntor të 2016-s, për të hequr dorë nga një kërkesë financiare tatimore me vlerë 47 milionë euro në dëm të bankës Warburg.
Në fokus të hetimit është edhe deputeti i SPD-së, Johannes Kahrs, por edhe politikanë të tjerë, të cilët dyshohen për favorizim të evazionit fiskal. /euronews
