Për shkak të thatësirës më të madhe në 40 vitet e fundit në Somali, 1 milion njerëz në vend vuajnë nga mungesa e ushqimit dhe ujit, raporton Anadolu Agency (AA).
Farhiyo Ahmed, e cila jeton me 7 fëmijët e saj në rajonin Dolow në jugperëndim të vendit, për AA tha se kishin vështirësi në gjetjen e ujit dhe ushqimit.
Në vendin ku rreth 1 milion njerëz vuajnë nga mungesa e ushqimit dhe ujit të lidhura me thatësirën, Ahmed shpjegoi se ata u detyruan të migronin me fëmijët e tyre dhe u strehuan në një kamp refugjatësh.
“Unë erdha në këtë kamp sepse humbëm gjithçka dhe nuk kishte ushqim për t’i ushqyer fëmijët e mi”, tha Ahmed.
Duke thënë se është e vështirë të jetosh në kamp, Ahmed theksoi se ata nuk mund të plotësojnë plotësisht nevojat e tyre për strehim dhe arsimim si dhe problemin e ushqimit.
Muhibo Ali Hilowle, 57-vjeçare, nënë e 9 fëmijëve tha se ajo kurrë nuk ishte përballur me një thatësirë kaq të rëndë në jetën e saj.
“Si e rritur, përpiqem të mbijetoj vetëm me ujë, por fëmijët nuk kanë ngrënë për dy ditë”, tha Hilowle.
Saruuro Bishaar Abdi tha se ata erdhën në kamp me 10 fëmijët e tyre duke ecur në këmbë për një javë.
“Për shkak të thatësirës më ngordhën kafshët dhe nuk kemi me çfarë t’i ushqejmë fëmijët e mi. Prandaj kam ardhur këtu”, tha Abdi.
– Rreth gjysma e popullsisë së vendit është në pritje të ndihmës
Abdirahman Abdishakur Warsame, përfaqësuesi special i Presidencës Somaleze për Luftimin e Thatësirës për AA tërhoqi vëmendjen për nevojën që Somalia dhe komuniteti ndërkombëtar të punojnë së bashku.
“Unë po vizitoj vende të ndryshme dhe po vëzhgoj ata që janë prekur nga thatësira. Ne po përpiqemi të koordinohemi për t’i ndihmuar këta njerëz”, tha Warsame.
Koordinatori i OKB-së për Somalinë, Adam Abdelmoula tha se Somalia ka përjetuar thatësirën më të rëndë që ka parë ndonjëherë.
Ai potencoi se shumë rajone të Somalisë po luftojnë me thatësirën dhe se më shumë se 7 milionë njerëz, ekuivalente me rreth gjysmën e popullsisë së vendit, kanë nevojë për ndihmë urgjente.
Përfaqësuesi i Organizatës Botërore të Shëndetësisë dr. Mamunur Rahman Malik tha se problemi i ushqimit ndikon negativisht në shëndetin e njerëzve.
“Ne mendojmë se në të ardhmen njerëzit do të vdesin më shumë nga sëmundjet sesa nga uria, nëse nuk merren masa paraprake”, tha Malik.
Qeveria somaleze shpalli “emergjencë” mbarëkombëtare më 23 nëntor 2021 për shkak të thatësirës në rritje.
