Ushtria sudaneze dhe grupi paramilitar Forcat e Mbështetjes së Shpejtë ranë kanë rënë dakord për një armëpushim shtatëditor, raportuan mediat arabe, transmeton Anadolu.
Lajmi fillimisht u bë i ditur nga Al-Jazeera, duke cituar burime të Ministrisë së Jashtme të Arabisë Saudite.
Ndërkaq, televizioni Al-Arabiya i financuar nga Arabia Saudite raportoi se marrëveshja midis ushtrisë dhe grupit paraushtarak do të hyjë në fuqi pas 48 orësh.
Marrëveshja përfshin lejimin e grupeve të armatosura të përfshira të evakuojnë spitalet dhe lehtësimin e riparimit të objekteve që i shërbejnë publikut.
Departamenti amerikan i Shtetit publikoi deklarata të përbashkëta të nënshkruara nga ushtria sudaneze dhe RSF-ja për armëpushimin dhe marrëveshjet e lidhura.
“Në Xhide, Forcat e Armatosura të Sudanit dhe Forcat e Mbështetjes së Shpejtë nënshkruan armëpushimin e parë që nga fillimi i konfliktit. Ka kaluar koha për të pushuar armët dhe për të lejuar qasje të papenguar humanitare. Unë u lutem të dyja palëve që të mbështesin këtë marrëveshje – bota po shikon”, shkroi në Twitter Sekretari i Shtetit Antony Blinken.
Të paktën 850 civilë janë vrarë dhe më shumë se 3.300 janë plagosur në luftimet midis ushtrisë dhe RSF-së që nga 15 prilli, sipas mjekëve vendas.
Pas bisedimeve të para ballë për ballë në Arabinë Saudite, ushtria dhe RSF-ja më 11 maj nënshkruan një deklaratë angazhimi për të mbrojtur civilët në Sudan. Pavarësisht marrëveshjes, përleshjet vazhduan midis rivalëve ushtarakë, veçanërisht në kryeqytetin Khartoum.
Një mosmarrëveshje ishte shfaqur muajt e fundit midis ushtrisë dhe RSF-së rreth integrimit të grupit paraushtarak në forcat e armatosura, një kusht kyç i marrëveshjes së tranzicionit të Sudanit me grupet politike.
Sudani ka qenë pa një qeveri funksionale që nga tetori i vitit 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme, një lëvizje kjo e cilësuar nga forcat politike si “grusht shteti”.
Periudha e tranzicionit e Sudanit, e cila filloi në gusht 2019 pas rrëzimit të presidentit Omar al-Bashir, ishte planifikuar të përfundonte me zgjedhje në fillim të vitit 2024.
