Përleshjet të ashpra të armatosura u rifilluan të enjten në mëngjes midis ushtrisë sudaneze dhe forcave paraushtarake në disa zona në kryeqytetin Khartoum, raporton Anadolu.
Dëshmitarët okularë thanë për Anadolu se përleshjet u dëgjuan pranë pallatit presidencial dhe komandës së përgjithshme të ushtrisë sudaneze në qendër të Khartoumit.
Në një deklaratë, ushtria sudaneze tha se forcat e saj u përleshën me Forcat e Mbështetjes së Shpejtë (RSF), që u përpoqën të sulmonin komandën e ushtrisë në qytetin fqinj Bahri.
Deklarata shtoi se ushtria u shkaktoi humbje të mëdha dhe viktima midis radhëve të RSF-së, duke i detyruar ata të tërhiqen.
Ndërkohë, RSF fajësoi ushtrinë sudaneze për përleshjet dhe e akuzoi atë për shkeljen e armëpushimit dhe për sulmin e lagjeve të banuara me artileri dhe avionë në atë që ajo e përshkroi si një “mënyrë qyqare”.
Të martën, qeveria e Sudanit të Jugut njoftoi se dy gjeneralët rivalë në Sudan – shefi i ushtrisë Abdel Fattah al-Burhan dhe komandanti i forcave paraushtarake të RSF-së, Mohammed Hamdan “Hemedti” Dagalo, ranë dakord për një armëpushim shtatëditor që fillon të enjten.
Që nga fillimi i përleshjeve më 15 prill, më shumë se 550 njerëz janë vrarë së bashku me më shumë se 5.000 të tjerë të plagosur, sipas deklaratave të Ministrisë sudaneze të Shëndetësisë.
Mosmarrëveshjet e muajve të fundit u përshkallëzuan midis ushtrisë dhe forcave paraushtarake rreth integrimit të RSF-së në forcat e armatosura, që është kusht kyç i marrëveshjes së tranzicionit të Sudanit me grupet politike.
Sudani ka qenë pa një qeveri funksionale që nga tetori i vitit 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme, që u cilësua nga forcat politike si një “grusht shteti”.
Periudha kalimtare e Sudanit, e cila filloi në gusht 2019 pas rrëzimit të presidentit Omar al-Bashir, ishte planifikuar të përfundonte me zgjedhjet në fillim të vitit 2024.
