Një grua shtatzënë, bashkëshorti i saj dhe foshnja e tyre e palindur u vranë në një sulm ajror izraelit që goditi një apartament në qytetin e Gazës të dielën në mëngjes.
Sipas raportimeve nga Gaza, shpërthimi ishte aq i fuqishëm sa foshnja u nxor jashtë barkut të nënës. Pamjet nga vendngjarja treguan trupin e foshnjës në dyshemenë e apartamentit.
Banorët e Gazës thonë se kishin shpresuar se njoftimet e fundit për një plan paqeje do t’i jepnin fund sulmeve, do të lehtësonin qasjen në ndihma humanitare, kujdes shëndetësor dhe lirinë e lëvizjes. Megjithatë, sipas tyre, situata në terren nuk ka ndryshuar.
Sulmet vazhdojnë në pjesë të ndryshme të Rripit të Gazës, ndërsa shumë familje mbeten të pastreha dhe jetojnë në pasiguri të vazhdueshme.
Një familje tjetër, e cila ishte larguar përkohësisht nga zona e saj, u kthye të nesërmen për të gjetur tendën ku jetonte të shkatërruar nga një sulm. Ata thanë se kishin humbur gjithçka dhe tani duhet ta nisin jetën nga e para.
Sulme janë raportuar në qytetin e Gazës, Khan Younis dhe Deir el-Balah, duke përfshirë veriun, jugun dhe pjesën qendrore të enklavës. Banorët shprehen se nuk besojnë më se ekziston ndonjë vend i sigurt në Rripin e Gazës. /mesazhi
