Presidenti amerikan Donald Trump ka deklaruar se një marrëveshje lidhur me Ngushticën e Hormuzit është shumë afër, ndërsa bëri të ditur se bisedimet me Iranin pritet të nisin këtë pasdite.
Duke folur në bordin e avionit presidencial Air Force One, Trump tha se Shtetet e Bashkuara kishin qenë të gatshme të ndërmerrnin një sulm ushtarak të madh, por ai u anulua pas kërkesave të Arabisë Saudite, Emirateve të Bashkuara Arabe, Katarit dhe vetë Iranit.
“Ne ishim gati për një sulm që do të ishte më i madhi që nga Lufta e Dytë Botërore, por aleatët kërkuan që të mos ndërmerrej, sepse besojnë se një marrëveshje është e afërt,” tha Trump.
Sipas tij, negociatat me Iranin do të fokusohen fillimisht te situata në Ngushticën e Hormuzit dhe më pas te çarmatimi bërthamor i Iranit.
Trump shtoi se kishte konsultuar udhëheqësit sauditë, përfshirë mbretin dhe princin e kurorës, të cilët, sipas tij, preferuan një zgjidhje diplomatike në vend të një ndërhyrjeje ushtarake.
Ai theksoi se një sulm mund të kishte pasoja të paparashikueshme për rajonin, duke përfshirë flukse të mëdha refugjatësh dhe një përshkallëzim të konfliktit, ndaj, sipas tij, diplomacia mbetet opsioni më i mirë në këtë fazë. /mesazhi
