RTV AHIRETI
LajmeRajon dhe Botë

Takimi katërpalësh në Moskë: Vendoset përgatitja e udhërrëfyesit për avancimin e marrëdhënieve Turqi-Siri

takimi-katerpalesh-ne-moske:-vendoset-pergatitja-e-udherrefyesit-per-avancimin-e-marredhenieve-turqi-siri

Ministrat e Jashtëm të Turqisë, Rusisë, Iranit dhe Sirisë vendosën sot të përgatisin një udhërrëfyes për avancimin e marrëdhënieve Turqi-Siri, thuhet në një deklaratë të përbashkët, transmeton Anadolu.

Një takim mes ministrave të jashtëm të Turqisë, Rusisë, Iranit dhe Sirisë u mbajt sot në Moskë.

Në takim, pjesëmarrësit shkëmbyen mendime mbi përpjekjet për normalizimin e marrëdhënieve midis Turqisë dhe Sirisë dhe diskutuan luftën kundër terrorizmit, proceset politike dhe çështjet humanitare, duke përfshirë kthimin vullnetar, të sigurt dhe dinjitoz të sirianëve, sipas Ministrisë së Jashtme turke.

“Pjesëmarrësit ripohuan gjithashtu përkushtimin e tyre për sovranitetin, integritetin territorial të Sirisë dhe luftën kundër terrorizmit në të gjitha format dhe manifestimet e tij, në përputhje me Rezolutën 2254 të Këshillit të Sigurimit të OKB-së dhe deklaratat zyrtare të nxjerra nën ‘Formatin e Astanës’”, thuhet në deklaratën e përbashkët.

Bisedimet e formatit të Astanës filluan në vitin 2017 për të rivendosur paqen dhe stabilitetin në Siri, e cila është tronditur nga konflikti mbi-njëdekadësh që nga protestat prodemokratike në vitin 2011.

“Pjesëmarrësit vendosën gjithashtu të udhëzojnë zëvendësministrat e Punëve të Jashtme që të përgatisin një udhërrëfyes në koordinim me ministritë e mbrojtjes dhe njësitë e inteligjencës të katër vendeve për avancimin e marrëdhënieve midis Turqisë dhe Sirisë”, thuhet në deklaratë.

Katër ministrat e jashtëm ranë dakord të vazhdojnë kontaktet në formatin katërpalësh, duke shtuar se bisedimet në Moskë u zhvilluan në një atmosferë pozitive dhe konstruktive, thuhet më tej.

Në një postim në Twitter pas takimit, ministri i Jashtëm turk Mevlüt Çavuşoğlu tha se gjatë bisedimeve, ai theksoi bashkëpunimin në luftën kundër terrorizmit, bashkëpunimin për të krijuar një bazë për kthimin e sirianëve, për të çuar përpara procesin politik në Siri dhe për mbrojtjen e integritetit territorial të Sirisë.

Dhjetorin e kaluar, ministrat e mbrojtjes dhe shefat e inteligjencës së Turqisë, Rusisë dhe regjimit sirian u takuan në Moskë dhe ranë dakord të vazhdojnë takimet trepalëshe për të siguruar stabilitetin në Siri dhe rajonin më të gjerë.

Në bisedime u përfshi edhe Irani, ndërsa Turqia më parë kishte thënë se Ankaraja do të ishte “e kënaqur nëse Irani përfshihej në këtë proces”.

Siria është zhytur në një luftë të egër civile që nga fillimi i vitit 2011, kur regjimi i Bashar Al-Asadit shtypi protestat pro demokracisë me dhunë.

Related posts

Qeveria izraelite kundërshton njohjen e njëanshme të shtetit palestinez

admin

Macron: Klima dhe varfëria duhet të trajtohen njëkohësisht

admin

Rusia: Do të zhvillojmë bashkëpunimin ushtarak me Afrikën

rezart morina