Ministria Palestineze e Shëndetësisë njofton se një person është vrarë dhe pesë të tjerë janë plagosur gjatë 24 orëve të fundit si pasojë e sulmeve izraelite të vazhdueshme në Gaza.
Në raportin ditor, ministria thekson se janë nxjerrë edhe gjashtë trupa, të cilat u dërguan në spitale në të gjithë Rripin e Gazës. Ajo shton se “një numër viktimash ende ndodhen nën rrënoja dhe në rrugë, pasi ambulancat dhe ekipet e mbrojtjes civile nuk mund të arrijnë tek ato”.
Që nga hyrja në fuqi e armëpushimit më 11 tetor, ministria raporton se 241 persona janë vrarë dhe 619 të plagosur, ndërsa janë nxjerrë 528 trupa.
Në total, që nga 7 tetori 2023, numri i palestinezëve të vrarë ka arritur në 69,176, ndërsa 170,690 janë plagosur, sipas të dhënave të ministrisë.
