Vendimi ka trazuar botën e MAGA-s, ku po shtohen zërat kritikë ndaj kursit të Trump
Tucker Carlson ka deklaruar se nuk do ta mbështesë më Partinë Republikane. “Sondazhet flasin qartë. Nuk do ta mbështesja Partinë Republikane, nuk ka asnjë shans të fitojë”, tha ai, duke shtuar: “Jo sepse mbështes Partinë Demokratike. Nuk e di ende se çfarë do të bëj.”
“Kam votuar si republikan gjatë gjithë jetës sime, kam punuar në Fox News. Për 35 vjet kam qenë një mbrojtës i palëkundur i Partisë Republikane, por kjo nuk mund të mbrohet më, sepse është e pamoralshme”- vazhdoi ai.
Dikur një aleat i vendosur i Donald Trump-it, Carlson u shkëput nga presidenti amerikan pas zhvillimeve që lidhen me luftën në Iran, duke argumentuar se Shtetet e Bashkuara u tërhoqën në konflikt për shkak të ndikimit të Izraelit.
Vetëm disa orë pas deklaratës së Carlson-it, edhe ish-deputetja Marjorie Taylor Greene njoftoi largimin e saj nga Partia Republikane.
Edhe ajo, dikur një mbështetëse e flaktë e Trump-it, është distancuar prej tij gjatë vitit të fundit për disa çështje, nga politika në Lindjen e Mesme dhe inflacioni, deri te dosjet e Jeffrey Epstein.
Nuk është sekret që Carlson dhe Greene përfaqësojnë një pjesë të rëndësishme të lëvizjes politike dhe mediatike MAGA, e cila ndihet e zhgënjyer nga Trump, veçanërisht për shkak të qëndrimit të tij ndaj Iranit.
Megjithatë, baza elektorale e Trump-it mbetet ende kryesisht besnike ndaj tij. Sidoqoftë, nëse kriza iraniane vazhdon ose përshkallëzohet, nuk përjashtohet mundësia që ndarjet të shfaqen edhe brenda elektoratit republikan.
Ndërkohë, disa analistë spekulojnë se Carlson mund të ketë ambicie presidenciale. Ai i ka mohuar këto zëra edhe në të kaluarën. Që gjashtë vjet më parë qarkullonin thashetheme se mund të kandidonte për Shtëpinë e Bardhë në vitin 2024, por ato nuk u materializuan kurrë.
Përkundrazi, ai mbështeti fuqishëm kandidaturën e Trump-it dhe ishte një nga folësit kryesorë në mbrëmjen përmbyllëse të Konventës Kombëtare Republikane në Milwaukee.
Megjithatë, largimi i tij nga Partia Republikane nuk ka kaluar pa u vënë re. Sipas platformës së basteve Polymarket, Carlson ka aktualisht rreth 6 për qind mundësi për të fituar nominimin republikan për president. Kjo do ta rendiste atë në vendin e tretë, pas JD Vance (37 për qind) dhe Marco Rubio (21 për qind).
Sigurisht, këto nuk janë rezultate sondazhesh shkencore, por tregues të perceptimit të tregut të basteve. Gjithsesi, shifrat mbeten domethënëse. Për më tepër, në teori Carlson mund të kandidojë edhe si i pavarur.
Një skenar i tillë vështirë se do ta çonte në Shtëpinë e Bardhë, por mund t’u hiqte vota të rëndësishme kandidatëve kryesorë, veçanërisht republikanëve.
Për momentin, gjithçka mbetet në nivel hipotezash. Carlson mund të pajtohet sërish me Trump-in. Po ashtu, ai mund të zgjedhë të mbështesë J.D.Vance, me të cilin ka pasur tradicionalisht marrëdhënie shumë të mira. Edhe në aspektin politik, gazetari vazhdon të ndajë disa qëndrime me zëvendëspresidentin aktual.
Mbetet për t’u parë nëse Carlson do të rreshtohet përkrah Vance në zgjedhjet paraprake republikane, apo do të ndjekë një rrugë tjetër politike. Vetëm koha do të tregojë se çfarë ndikimi real do të ketë largimi i tij nga Partia Republikane në skenën politike dhe elektorale amerikane. /tesheshi
