Izraeli tha sot se SHBA-ja ka dhënë dritën jeshile për t’i shitur Gjermanisë sistemin e mbrojtjes izraelite “Arrow 3”, duke hapur rrugën për një marrëveshje të rëndësishme të mbrojtjes.
Ministria izraelite e Mbrojtjes tha se marrëveshja prej 3.5 miliardë dollarësh do të jetë marrëveshja më e madhe për mbrojtjen e arritur ndonjëherë në vend.
Departamenti Amerikan i Shtetit njoftoi sot qeverinë izraelite se qeveria e SHBA-së ka miratuar kërkesën e Izraelit që Gjermania të blejë sistemin e mbrojtjes raketore “Arrow 3″ nga Izraeli”, tha një zëdhënës i Ministrisë së Mbrojtjes në një deklaratë.
Miratimi i SHBA-së u pa si pengesa e fundit e madhe për marrëveshjen historike midis Gjermanisë dhe Izraelit.
“Marrëveshja duhet të nënshkruhet nga Ministritë e Mbrojtjes të të dy vendeve dhe Industria e Hapësirës Ajrore të Izraelit, prodhuesi kryesor i hapësirës ajrore dhe aviacionit në vend”, thuhet në deklaratë.
“Kontrata e plotë do të jetë gati për t’u nënshkruar deri në fund të vitit 2023”,sipas deklaratës.
Komisionet e buxhetit dhe mbrojtjes të parlamentit gjerman kishin votuar pro blerjes së sistemit në qershor.
Paratë për blerjen do të sigurohen nga fondi special prej 100 miliardë eurosh (108.7 miliardë dollarë) i miratuar në përgjigje të luftës së Rusisë kundër Ukrainës.
“Arrow 3” u prodhua bashkërisht nga Izraeli dhe SHBA dhe do të jetë operacional deri në fund të vitit 2025.
Me iniciativën e Gjermanisë, ai do të bëhet pjesë e një sistemi evropian të mbrojtjes ajrore.
“Arrow 3” është një armë e nivelit të lartë të sistemit të mbrojtjes raketore të Izraelit me shumë faza dhe mund të shkatërrojë armët sulmuese në një lartësi prej më shumë se 100 kilometrash. /atsh
