Të paktën 300 fëmijë raportohet se janë vrarë në Gaza gjatë 300 ditëve që nga shpallja e armëpushimit në tetor 2025, njoftoi të enjten UNICEF.
Sipas organizatës, kjo do të thotë se mesatarisht një fëmijë humb jetën çdo ditë, pavarësisht marrëveshjes për pezullimin e operacioneve ushtarake dhe lejimin e hyrjes së plotë të ndihmave humanitare dhe atyre të emergjencës pothuajse 10 muaj më parë.
“Një armëpushim që lë mesatarisht një fëmijë të vdekur çdo ditë po i dështon fëmijët,” deklaroi drejtori rajonal i UNICEF-it për Lindjen e Mesme dhe Afrikën e Veriut, Edouard Beigbeder. “Ndërsa qindra fëmijë të tjerë janë plagosur, shumë prej tyre rëndë, fëmijët në Gaza ende presin fundin e dhunës që u ishte premtuar.”
Beigbeder tha se njoftimet e ditëve të fundit paraqesin një plan për fazën e ardhshme të armëpushimit, duke përfshirë hapa drejt përfundimit të luftimeve dhe shtimit të ndihmës humanitare. Sipas tij, kjo sjell shpresë të re dhe një mundësi për t’i dhënë fund vrasjes së fëmijëve, por shtoi se “fëmijët e Gazës kanë dëgjuar premtime edhe më parë. Këtë herë, marrëveshjet duhet të shndërrohen në veprime.”
UNICEF u bëri thirrje të gjitha palëve të respektojnë detyrimet e tyre sipas së drejtës ndërkombëtare, përfshirë të drejtën humanitare dhe të drejtat e njeriut, duke theksuar detyrimin për të mbrojtur fëmijët, për të garantuar qasjen e tyre në shërbimet dhe nevojat bazë, si kujdesi shëndetësor, arsimi, uji i pijshëm dhe ushqimi, si dhe për të lejuar qasje të sigurt, të shpejtë dhe pa pengesa për ndihmat humanitare ndaj fëmijëve në nevojë. /mesazhi
