Ushtria amerikane tha të hënën se kishte kryer një sulm ndaj një anijeje të dyshuar për trafik droge në Paqësorin lindor, duke shënuar sulmin e parë të raportuar të këtij lloji në më shumë se dy muaj, transmeton Anadolu.
“Task-Forca e Përbashkët për Hemisferën Perëndimore kreu një sulm kinetik vdekjeprurës ndaj një anijeje të vogël që lundronte përgjatë rrugëve të njohura të trafikut të drogës në Paqësorin lindor”, tha Komanda Jugore e SHBA-së (SOUTHCOM) në një deklaratë në platformën amerikane të rrjeteve sociale X.
SOUTHCOM tha se dy persona u vranë në sulmin e së dielës.
Para pauzës dymujore, ushtria amerikane kishte shkatërruar të paktën 67 anije dhe kishte vrarë të paktën 221 persona që nga fillimi i fushatës “Operacioni Southern Spear” në shtator 2025.
Në deklaratën e tij të së hënës, komandanti i SOUTHCOM-it, gjenerali Francis L. Donovan, rikonfirmoi angazhimin e ushtrisë amerikane për luftën kundër trafikut të drogës, duke thënë: “Jemi të vendosur t’u imponojmë pengesa të plota sistemike narkoterroristëve – të ndërpresim operacionet e tyre, të shkatërrojmë udhëheqjen e tyre dhe të eliminojmë terrorin e karteleve në të gjithë rajonin”.
“Ky operacion është një demonstrim i fuqishëm i saktësisë sonë vdekjeprurëse, kapacitetit tonë dërrmues dhe vendosmërisë sonë absolute për të mbrojtur territorin e SHBA-së”, tha Donovan në postim.
