Zjarrfikësit luftuan të enjten me zjarre në Greqinë qendrore dhe perëndimore, ndërsa erërat e forta vështirësuan përpjekjet për shuarjen e tyre. Ndërkohë, partia kryesore opozitare e vendit kritikoi mënyrën se si qeveria ka menaxhuar parandalimin e zjarreve dhe burimet për luftimin e tyre, transmeton Anadolu.
Njëri prej zjarreve shpërtheu pranë plazhit Kolymbada në pjesën jugore të ishullit Skyros, duke djegur bimësi të ulët në një zonë agro-pyjore, sipas gazetës Enikos.
Sipas autoriteteve lokale, në vendngjarje u angazhuan tetë zjarrfikës me katër automjete zjarrfikëse, të mbështetur nga katër avionë për shuarjen e zjarreve, të cilët kryen hedhje uji nga ajri.
Autobote me ujë dhe makineri ndërtimore nga autoritetet lokale iu bashkuan gjithashtu operacionit.
Erërat e forta vështirësuan përpjekjet për shuarjen e zjarrit.
Në një incident tjetër, një zjarr pyjor shpërtheu në një zonë agro-pyjore pranë Agia Marinës në njësinë rajonale të Ilisë në perëndim të vendit, sipas gazetës Kathimerini.
Shërbimi Grek i Zjarrfikësve dërgoi 42 zjarrfikës, përfshirë dy ekipe të specializuara për shuarjen e zjarreve në pyje, të mbështetur nga 13 automjete zjarrfikëse.
Tre avionë zjarrfikës kryen hedhje uji nga ajri, ndërsa autobotet me ujë dhe makineritë e rënda të qeverisjes lokale ndihmuan ekipet në terren.
Ndërsa operacionet e shuarjes vazhdonin, Nikos Pappas, sekretar i Komitetit Qendror të SYRIZA- Aleancës Progresive, akuzoi qeverinë se nuk ishte përgatitur në mënyrë të mjaftueshme për sezonin e zjarreve të këtij viti.
Në një intervistë për transmetuesin publik grek ERT, Pappas tha se fondet evropiane të destinuara për forcimin e kapaciteteve të Greqisë në luftimin e zjarreve nuk janë përdorur plotësisht, duke pretenduar se blerjet e planifikuara të avionëve zjarrfikës, dronëve dhe helikopterëve janë braktisur.
Ai gjithashtu vuri në pikëpyetje shpenzimet e qeverisë për projektet e pastrimit të pyjeve, duke kërkuar më shumë transparencë lidhur me masat parandaluese kundër zjarreve dhe përdorimin e fondeve publike.
Pappas kritikoi më tej varësinë e qeverisë nga avionët zjarrfikës të marrë me qira dhe pretendoi se disa pajisje zjarrfikëse mbeten të papërdorura, pavarësisht se ka personel të trajnuar në dispozicion.
