NATO-ja po vazhdon ta hetojë sulmin me raketa në Poloni, ku u vranë dy persona, raportoi BBC-ja të mërkurën. Në një analizë të shkurtër, mediumi i përmblodhi reagimet e para rreth kësaj ngjarjeje.
Presidenti i Ukrainës, Volodymyr Zelensky, fajësoi menjëherë Rusinë, duke e quajtur rastin “sulm ndaj sigurisë kolektive” dhe “përshkallëzim masiv”.
Për sulmin kanë reaguar edhe vendet baltike që gjenden pranë kufijve me Rusinë.
“Çdo centimetër i territorit të NATO-s duhet të mbrohet”, deklaroi presidenti i Lituanisë, Gitanas Nauseda në Tëitter.
Kryeministrja e Estonisë, Kaia Kallas, deklaroi se Perëndimi duhet t’i japë Ukrainë më shumë mbështetje ushtarake, humanitare dhe financiare.
“Ky incident tregon se gabimet ndodhin në luftë. Disa nga sistemet e raketave janë të vjetruara dhe duke pasur parasysh shkallën e sulmeve me raketa, është e habitshme që incidente të ngjashme nuk kanë ndodhur më herët”, shkruan BBC-ja.
Sekretari i përgjithshëm i NATO-s, Jens Stoltenberg, ka thënë se “nuk ka indikacione” se shpërthimi i raketës në Poloni ishte rezultat i një “sulmi të qëllimshëm”.
Të martën, kur ndodhi sulmi mbi Poloni, presidenti i Shteteve të Bashkuara të Amerikës, Joe Biden, ka zhvilluar një bisedë telefonike me presidentin polak, Andrzej Duda, ku është informuar për situatën. Edhe vendet e Bashkimit Evropian kanë deklaruar se janë në kontakt me Poloninë. /koha
