Në kryeqytetin lituanez Vilnius, ku po mbahet samiti dyditor i NATO-s, vendet e G7-tës kanë njoftuar nënshkrimin e një deklarate të përbashkët në mbështetje të Ukrainës.
Deklarata, që u nënshkrua nga Mbretëria e Bashkuar, SHBA-ja, Japonia, Kanadaja, Franca, Gjermania dhe Italia, përfshin zotime për të vepruar në mënyrë shumëpalëshe dhe në baza vend-me-vend për t’i ofruar Ukrainës garanci afatgjate sigurie.
Duke folur në njoftimin e deklaratës, presidenti amerikan, Joe Biden, tha se deklarata për Ukrainën “do ta bëjë të qartë se mbështetja jonë do të zgjasë gjatë në të ardhmen” dhe do të krijojë një rrugë drejt anëtarësimit në NATO për Ukrainën.
“Kjo nis një proces me të cilin secili nga kombet tona dhe çdo komb tjetër që dëshiron të marrë pjesë do të negociojë angazhimet afatgjata dypalëshe të sigurisë me dhe për Ukrainën. Ajo do të jetë një forcë stabiliteti në rajon dhe do të pengojë kundër çdo kërcënimi”, tha Biden.
Presidenti i Ukrainës, Volodymyr Zelenskyy, përshëndeti deklaratën dhe tha se rezultati i samitit të Vilniusit ishte “shumë i nevojshëm”.
“Ai hap mundësi të reja të sigurisë për Ukrainën”, tha presidenti ukrainas. /atsh
