Presidenti ukrainas, Volodymyr Zelensky ka thënë se po zhvillohen bisedime me Arabinë Saudite, Katarin, Turqinë dhe Zvicrën në lidhje me samitin e dytë për paqen në Ukrainë.
Zelensky ka thënë gjithashtu se ia kishte bërë të ditur kryeministrit të Indisë, Narendra Modi se do të mbështeste Indinë që të organizojë samitin e dytë për paqen, pasi Kievi shpreson të gjejë një mikpritës midis vendeve në Jugun Global, raporton Reuters.
“Por unë dua të jem i sinqertë dhe kjo vlen jo vetëm për Indinë, por për çdo shtet që do të pranonte organizimin e një samiti të dytë. Ne nuk do të jemi në gjendje të mbajmë një samit paqeje në një vend që nuk i është bashkuar ende deklaratës për paqe të samitit”, ka thënë Zelensky.
Presidenti ukrainas shtoi se ai diskutoi të gjitha pikat nga komunikata dhe samiti i mëparshëm i paqes edhe gjatë takimit me Modin të premten.
Samiti i parë i paqes për Ukrainën është mbajtur në fillim të qershorit në Lucern të Zvicrës.
