Presidenti ukrainas, Volodymyr Zelenskyy, ka nënshkruar një dekret për vendosjen e sanksioneve ndaj 95 individëve dhe 70 subjekteve juridike, duke pretenduar se ata janë të përfshirë në furnizimin e industrisë ushtarake të Rusisë, transmeton Anadolu.
Zyra presidenciale njoftoi se dekreti vë në zbatim një vendim të Këshillit të Sigurisë Kombëtare dhe Mbrojtjes, duke shtuar se shumica e personave të sanksionuar janë shtetas dhe banorë të Rusisë.
“Këta janë individë dhe kompani të lidhura me shërbimin e porosive shtetërore të mbrojtjes së Rusisë dhe me aktivitetet e kompleksit të saj ushtarako-industrial”, tha zyra presidenciale.
Sipas saj, lista përfshin ndërmarrje dhe drejtuesit e tyre që prodhojnë dhe furnizojnë pajisje komunikimi, sisteme të luftës elektronike dhe produkte mikroelektronike për “kompleksin ushtarako-industrial dhe agjencitë e sigurisë të Rusisë”.
“Sanksionet janë vendosur ndaj ndërmarrjeve industriale në sektorët kimik, nxjerrës dhe metalurgjik të Rusisë, si edhe në kompleksin e saj të karburanteve dhe energjisë”, thuhet më tej.
Ukraina, sipas njoftimit, do të vazhdojë të punojë me partnerët e saj për të harmonizuar sanksionet brenda “juridiksioneve partnere”.
“Disa nga këto masa do të pasqyrohen në paketën e 20-të të sanksioneve të BE-së, e cila aktualisht është në përgatitje”, paralajmëroi zyra presidenciale.
