Ministri i Jashtëm i Iranit, Abbas Araghchi, është nisur drejt Moskes pas një serie vizitash diplomatike në rajon, në një kohë kur përpjekjet për paqe mes Teheranit dhe Uashingtonit mbeten të bllokuara.
Araghchi zhvilloi vizita në Pakistan dhe Oman, ku u takua me drejtues të lartë, përfshirë shefin e ushtrisë pakistaneze Asim Munir, kryeministrin Shehbaz Sharif dhe ministrin e Jashtëm Ishaq Dar.
Pas këtyre takimeve, ai u kthye përkohësisht në Islamabad dhe më pas u nis për në Moskë, ku pritet të zhvillojë bisedime me zyrtarë të lartë rusë.
Sipas mediave iraniane, Teherani ka dërguar “mesazhe me shkrim” drejt Shteteve të Bashkuara përmes ndërmjetësimit të Pakistanit, duke përcaktuar vijat e kuqe, përfshirë çështjet bërthamore dhe Ngushticën e Hormuzit. Megjithatë, këto nuk konsiderohen si pjesë e negociatave formale.
Zhvillimet vijnë në një moment kur kontaktet direkte mes Iranit dhe SHBA-së janë të ndërprera, ndërsa përpjekjet diplomatike për zbutjen e tensioneve vazhdojnë në disa fronte. /mesazhi
