Rusia thirri ambasadorin e Armenisë, aleatit të saj vjetër, duke i dorëzuar atij një notë diplomatike për një sërë hapash “jomiqësorë”, duke përfshirë stërvitjet e përbashkëta ushtarake të Jerevanit me SHBA-në, transmeton Anadolu.
Në një deklaratë të Ministrisë së Punëve të Jashtme (MPJ) të Rusisë thuhet se ambasadorit armen në Moskë, Vagharshak Harutiunyan, iu dha një listë e këtyre hapave jomiqësorë, duke përfshirë vendimin e Jerevanit për t’u bërë pjesë e Gjykatës Penale Ndërkombëtare dhe për të kryer në territorin e saj një stërvitje të përbashkët ushtarake me SHBA-në, si dhe dërgimin e ndihmave humanitare gjatë vizitës së gruas së kryeministrit armen në Ukrainë.
Para disa ditësh, Kremlini shprehu shqetësimin për njoftimin e Ministrisë Armene të Mbrojtjes se ushtria amerikane do të marrë pjesë në stërvitjet ushtarake “Eagle Partner 2023” nga 11 deri më 20 shtator.
Në deklaratën e MPJ-së ruse dënohen gjithashtu “deklaratat fyese” që dyshohet se janë bërë më 6 shtator nga Alen Simonyan, kryetar i Asamblesë Kombëtare Armene, në lidhje me zëdhënësen e Ministrisë së Jashtme ruse, Maria Zakharova.
Marrëdhëniet midis Rusisë dhe Armenisë janë përkeqësuar që kur politikani properëndimor Nikol Pashinyan erdhi në pushtet si rezultat i një grusht shteti në vitin 2018.
Pashinyan dhe kabineti i tij fajësojnë Rusinë për humbjen e Armenisë në luftën e vitit 2020 me Azerbajxhanin, e cila zgjati 44 ditë.
Moska i referohet statusit të njohur ndërkombëtarisht të rajonit të Karabakut si territor i Azerbajxhanit, që do të thotë se askush nuk e sulmoi Armeninë dhe nuk kishte asnjë arsye për të ndërhyrë.
