Degët e Lidhjes Demokratike të Kosovës në Pejë dhe Lipjan kanë kërkuar dorëheqjen e lidershipit përfshirë edhe kryetarit të partisë, Lumir Abdixhiku.
Kjo është thënë pas mbledhjeve të kryesisë të mbajtura nga këto degë.
Nga dega e Pejës është thënë se rezultati i zgjedhjeve të 7 qershorit kërkon reflektim.
“Pas mbledhjes së Kryesisë dhe analizës së rezultateve të zgjedhjeve të qershorit, me shumicë votash, anëtarët e Kryesisë në Pejë kanë kërkuar reflektim të thellë politik dhe marrjen e përgjegjësisë nga lidershipi i partisë. Në këtë drejtim, është kërkuar dorëheqja si akt moral dhe politik, duke vlerësuar se përgjegjësia për rezultatin duhet të bartet nga udhëheqja. Kryesia konsideron se ky duhet të jetë një imperativ i qartë i kësaj shtëpie të demokracisë, në funksion të ruajtjes së besimit të anëtarësisë dhe forcimit të standardeve demokratike brenda partisë”, thuhet në postimin në Facebbok.
Kërkesë e njëjtë ka dal edhe pas mbledhjes së kryesisë së degës në Lipjan.
Nga kjo degë ka thënë se ndonëse vota e partisë në këtë komunë nuk ka ndryshuar shumë nga ato të kaluarat, vlerësohet se rezultati i përgjithshëm nuk mund t’i atribuohet vetëm degëve të partisë.
“Në këtë frymë, pas një diskutimi të gjatë dhe një analize të detajuar të secilës qendër votimi në Degën e Lipjanit, si dhe të gjendjes aktuale politike dhe organizative brenda Lidhjes Demokratike të Kosovës, Kryesia e Degës kërkon dorëheqjen e Kryetarit të LDK-së, si standard të përgjegjësisë politike dhe si akt reflektimi ndaj mesazhit që qytetarët kanë përcjellë përmes votës së tyre”, thuhet nga dega e LDK-së në Lipjan.
LDK në zgjedhjet e fundit është renditur e treta duke fituar 18 ulëse në Kuvendin e Kosovës.
