Kreu i organit legjislativ të Kinës priti Mbretin e Jordanisë, Abdullah II, i cili ndodhet për vizitë në Pekin, ndërsa të dyja palët synojnë forcimin e marrëdhënieve dypalëshe, transmeton Anadolu.
Mbreti Abdullah u takua me Zhao Lejin, kryetar i Komitetit të Përhershëm të Kongresit Kombëtar Popullor, në Pekin, njoftoi Oborri Mbretëror i Jordanisë në një deklaratë në platformën sociale amerikane X.
Në takim u diskutuan mënyrat e forcimit të partneritetit strategjik mes dy vendeve, thuhet në deklaratë.
Zhao ka thënë se Kina është “e gatshme” të punojë me Jordaninë për të “çuar përpara miqësinë tradicionale, rritur bashkëpunimin praktik dhe promovuar zhvillimin e qëndrueshëm, të shëndetshëm dhe të qëndrueshëm të marrëdhënieve Kinë-Jordani”, raportoi agjencia shtetërore kineze e lajmeve Xinhua.
Kongresi Kombëtar Popullor është “i gatshëm të thellojë shkëmbimet miqësore me Asamblenë Kombëtare të Jordanisë, të shfrytëzojë më mirë platforma të tilla si seminari për parlamentarët nga vendet në zhvillim, të rrisë mësimin e ndërsjellë në fusha përfshirë demokracinë, sundimin e ligjit dhe mirëqenien e njerëzve, si dhe të kontribuojë në avancimin e partneritetit strategjik Kinë-Jordani”, shtoi ai.
Mbreti Abdullah ndodhet në një vizitë shtetërore njëjavore në Kinë që prej së martës. Ai ka vizituar qendrën financiare të Shangait, si dhe qytetin teknologjik Shenzhen, përpara se të udhëtonte drejt Pekinit.
Presidenti kinez Xi Jinping dhe kryeministri Li Qiang do ta presin gjithashtu mbretin në Pekin.
Kina u bë vitin e kaluar partneri më i madh tregtar i Jordanisë, me vëllimin e tregtisë dypalëshe që arriti në rreth 6,7 miliardë dollarë.
Vizita shtetërore e mbretit përfundon më 24 gusht dhe kjo është vizita e nëntë e Abdullahut në Kinë në përgjithësi që nga marrja e fronit në vitin 1999, si dhe e para që nga viti 2015.
