Agjencia e OKB-së për Energjinë Bërthamore ka dënuar sulmet ndaj impiantit atomik të Zaporizhias, aktualisht i kontrolluar nga trupat ruse.
Drejtori i përgjithshëm i Agjencisë, Rafael Grossi deklaroi se personat përgjegjës për shpërthimet e fuqishme në zonën pranë centralit të verifikuara të natën e së shtunës dhe mëngjesin e së dielës përbëjnë një “lojë me zjarrin”.
Nga ana tjetër, Kievi dhe Moska akuzojnë njëra-tjetrën.
“Regjimi i Kievit vijon provokimet që synojnë të krijojnë një katastrofë teknologjike në impiantin bërthamor të Zaporizhias. Më 19 nëntor, forcat e armatosura ukrainase qëlluan 11 bomba të kalibrit të lartë ndaj centralit. Ndërsa mëngjesin e 20 nëntorit kryen dy sulme”.- thotë Igor Konashenkov, zëdhënës i Ministrisë së Mbrojtjes, në Rusi.
Menaxherët e impiantit i thanë Agjencisë së OKB-së se struktura ka pësuar dëme në disa pjesë, sisteme dhe pajisje të saj, por deri tani nuk ka pasur dëme kritike për sigurinë.
