Ish-shefi i ushtrisë Petr Pavel fitoi zgjedhjet presidenciale në Çeki të shtunën pas një fushate në mbështetje të fortë të NATO-s dhe Bashkimit Evropian dhe për ndihmën për Ukrainën.
Gjenerali në pension 61-vjeçar që kandidonte për herë të parë për postin, parashikohet të fitojë me më shumë se 58% me pothuajse të gjitha votat e numëruara, duke lënë pas ish-kryeministrin miliarder Andrej Babis, një figurë mbizotëruese por polarizuese në politikën çeke gjatë dekadës së fundit.
Z. Pavel, që bëri fushatë si i pavarur dhe kishte fitoi mbështetjen e qeverisë së qendrës së djathtë, përcolli një mesazh uniteti dhe qetësie kur foli në Pragë të shtunën, pasi rezultatet treguan se ai kishte fituar.
“Vlerat si e vërteta, dinjiteti, respekti dhe modestia fituan,” u tha zoti Pavel mbështetësve dhe gazetarëve. “Jam i bindur se këto vlera ndahen nga një shumicë dërrmuese”.
Posti i presidentit është kryesisht ceremonial në Çeki, por kreu i shtetit zgjedh kryeministrat dhe krerët e bankave qendrore, ka një zë me peshë në politikën e jashtme dhe mund të nxisë qeverinë të ndjekë politika të caktuara.
Gjenerali në pension Pavel e merr detyrën në mars, duke zëvendësuar presidentin në largim Milos Zeman, një figurë përçarëse gjatë dy mandateve të tij në detyrë gjatë dekadës së fundit, i cili kishte mbështetur zotin Babis.
Z. Zeman kishte nxitur lidhje më të ngushta me Pekinin si edhe me Moskën deri kur Rusia filloi agresionin në Ukrainë dhe zgjedhja e zotit Pavel do të shënojë një ndryshim të qartë.
68 vjeçari Babis, një manjat biznesi që kryeson partinë më të madhe opozitare në parlament, kishte sulmuar z. Pavel duke e paraqitur si kandidat të qeverisë. Ai u përpoq të tërhiqte votuesit që ishin të pakënaqur me rritjen e çmimeve duke u zotuar se do të bënte presion ndaj qeverisë që të bënte më shumë për t’i ndihmuar ata.
Z. Babis dhe kryeministri Petr Fiala e uruan të shtunën zotin Pavel për fitoren. /voa
VYSTOUPENÍ K VÝSLEDKŮM PREZIDENTSKÉ VOLBY https://t.co/EoMLVMaMjS
— Petr Pavel (@general_pavel) January 28, 2023
