Ushtria izraelite njoftoi se ka vendosur të mbyllë të gjitha hyrjet dhe daljet në territoret palestineze për një periudhë treditore që nga 24 prilli, me rastin e “Ditës së Përkujtimit” dhe “Ditës së Pavarësisë”, transmeton Anadolu.
Në një deklaratë me shkrim në llogarinë e ushtrisë izraelite në Twitter, theksohet se vendimi është marrë në përputhje me vlerësimet e situatës së sigurisë dhe urdhrat e qeverisë izraelite.
Mbylljet gjatë Ditës së Përkujtimit dhe Ditës së Pavarësisë do të mbulojnë Bregun Perëndimor dhe Rripin e Gazës.
Mbyllja do të hyjë në fuqi nga e hëna, 24 prill.
Në deklaratë theksohet se gjatë mbylljes, kalimet për raste humanitare, mjekësore dhe të jashtëzakonshme do të lejohen vetëm pas miratimit të Koordinatorit të Aktiviteteve në Territoret Palestineze pranë Qeverisë Izraelite.
Dita e Përkujtimit, e shënuar nga Izraeli për të përkujtuar ushtarët e vdekur në luftërat e tij, bie më 25 prill të këtij viti sipas kalendarit hebraik. Ndërkaq, Dita e Pavarësisë, në të cilën mbahen aktivitete me rastin e ditës së themelimit të Izraelit, përkon me 26 prillin.
