Kina dhe Siria sot i ngritën marrëdhëniet e tyre dypalëshe në “partneritet strategjik” gjatë takimit të nivelit të lartë midis presidentit kinez, Xi Jinping dhe homologut të tij vizitues sirian, Bashar al-Assad, transmeton Anadolu.
Hua Chunying, zëdhënëse e Ministrisë së Jashtme kineze, tha se krijimi i partneritetit strategjik “do të jetë moment historik i rëndësishëm në historinë e marrëdhënieve Kinë-Siri, ku të dyja palët ndërtojnë mbi të kaluarën dhe nisin rrugën drejt së ardhmes”.
“Pala kineze është e gatshme të punojë me palën siriane për të mbështetur në mënyrë të vendosur njëri-tjetrin dhe për të mbështetur së bashku barazinë dhe drejtësinë ndërkombëtare”, tha Hua në X.
Xi priti Assadin në Hangzhou, kryeqyteti i provincës lindore Zhejiang, pasi ai mbërriti në Kinë të enjten për një vizitë zyrtare me ftesë të presidentit kinez, vizita e parë e tillë në gati dy dekada.
Ai do të marrë pjesë edhe në ceremoninë e hapjes së Lojërave të 19-ta Aziatike, të cilat po mbahen në Hangzhou.
Hera e fundit që ai vizitoi Kinën ishte në vitin 2004, për t’u takuar me presidentin e atëhershëm Hu Jintao.
Kjo është vizita e tij e parë në Kinë që nga shpërthimi i luftës civile siriane më shumë se 12 vjet më parë. Gjatë luftës, Siria kishte një nivel relativisht të ulët të angazhimit ndërkombëtar, por në vitet e fundit kjo ka filluar të ndryshojë.
Assad shoqërohet në vizitë nga zonja e parë Asma al-Assad. Delegacioni sirian do të vizitojë edhe kryeqytetin Pekin.
