Rreth 60 për qind e të plagosurve në sulmet izraelite në Rripin e bllokuar të Gazës janë gra dhe fëmijë. Zëvendësministri palestinez i shëndetësisë në Rripin e Gazës, Yusuf Abu al-Rish, tha se të gjithë shtretërit në spitalet e Gazës janë plot dhe se së shpejti do t’u mbarojnë ilaçet dhe furnizimet mjekësore.
“Rreth 60 për qind e të plagosurve në bombardimet izraelite të Rripit të Gazës janë gra dhe fëmijë,” tha Al-Rish.
Situata u përshkallëzua në Rripin e Gazës pas sulmeve nga grupi palestinez Hamas në qytetet izraelite të shtunën. Izraeli u kundërpërgjigj me sulme masive ajrore në Gaza.
Të paktën 1.055 palestinezë janë vrarë në sulmet izraelite në Rripin e bllokuar të Gazës.
Që nga 7 tetori janë plagosur 5.184 persona.
Të paktën 1.200 njerëz kanë vdekur në sulmet nga Gaza në Izrael.
