Të gjitha dosjet e strukturave paralele të Serbisë janë sekuestruar gjatë aksionit të sotëm në Shtërpcë.
Kështu ka bërë të ditur për Telegrafin prokurori i Prokurorisë Themelore në Ferizaj, Rasim Maloku.
“Jemi duke e zbatuar një urdhëresë të gjykatës për kontroll dhe sekuestrim te dokumentacionit dhe pajisjeve në objektin e strukturave ilegale. Janë sekuestruar të gjitha dosjet”, deklaroi ai.
Policia e Kosovës që nga orët e mëngjesit është duke e zbatuar urdhrin e Gjykatës së Ferizajt për bastisjen e katër lokacioneve në Shtërpcë dhe largimin e kamerave të vendosura nga strukturat ilegale.
Lidhur me këtë aksion, Prokuroria në Ferizaj përmes një komunikate për media tha se persona të arrestuar për momentin ende nuk ka.
“Prokuroria Themelore në Ferizaj, do t’iu mbaj të informuar me kohë për të gjitha zhvillimet e tjera rreth këtij aksioni”, thuhet në njoftimin për media.
