Ministri i Jashtëm i Belgjikës, Maxime Prevot, bëri thirrje të martën për zbatim të njëtrajtshëm të së drejtës ndërkombëtare në të gjitha konfliktet, duke theksuar se sovraniteti, integriteti territorial dhe mbrojtja e civilëve nuk mund të varen nga gjeografia, transmeton Anadolu.
Duke folur në Asamblenë e Përgjithshme të OKB-së, Prevot tha se parimet që mbështesin rendin ndërkombëtar duhet të respektohen jo vetëm në Evropë, por edhe në zonat e konfliktit, përfshirë Palestinën, Sudanin, Mianmarin, Republikën Demokratike të Kongos dhe Haitin.
Ai tha se rrethanat e konflikteve në mbarë botën mund të ndryshojnë, por parimet e së drejtës ndërkombëtare humanitare mbeten të zbatueshme.
“Asnjë jetë njerëzore nuk vlen më pak se një tjetër. Civilët mbeten civilë. Ata duhet të mbrohen”, tha ai.
Ai bëri gjithashtu thirrje që ndihma humanitare të mund të arrijë te civilët në zonat e konfliktit, duke argumentuar se ndihma nuk duhet të trajtohet si “shpenzim opsional, shpërblim apo mjet negocimi”.
Prevot e lidhi parimin e zbatimit të barabartë të së drejtës ndërkombëtare edhe me luftën në Ukrainë, duke paralajmëruar se lejimi i ndryshimit të kufijve me forcë do t’i bënte kufijtë në vende të tjera më pak të sigurt.
“I njëjti standard duhet të na udhëheqë edhe kur bëhet fjalë për të drejtën ndërkombëtare humanitare. Rregullat e saj nuk zbatohen vetëm kur na përshtaten”, tha ai.
– Reforma e OKB-së, inteligjenca artificiale
Prevot bëri gjithashtu thirrje për reformimin e Kombeve të Bashkuara, duke paralajmëruar se reformat nuk duhet të dëmtojnë aftësinë e organizatës për të përmbushur funksionet e saj themelore.
Ai kërkoi gjithashtu reforma për të siguruar përfaqësim më të mirë të çdo rajoni të botës.
