Shefi i politikës së jashtme të Bashkimit Evropian, Josep Borrell, tha të dielën se Lëvizja e Rezistencës Islamike (Hamasi) nuk mund të eliminohet sepse është një “ide”, duke theksuar se kushtet në “Bregun Perëndimor janë pengesa e vërtetë për zgjidhjen me dy shtete”.
Borrell shtoi – gjatë fjalimit të tij në Konferencën e Sigurisë në Mynih – se alternativa e vetme është që Izraeli dhe Palestina të jetojnë krah për krah në paqe dhe se kjo nuk do të arrihet vetëm me mjete ushtarake.
Zyrtari evropian theksoi se situata në Bregun Perëndimor të pushtuar nga Izraeli përbën një pengesë të madhe për arritjen e një zgjidhjeje të qëndrueshme që vendos paqen midis Izraelit dhe palestinezëve, duke thënë: “Bregu Perëndimor është dëshmitar i vlimit… Mund të jemi në prag të një shpërthimi më të madh”.
Borrell shpjegoi se Bashkimi Evropian duhet të “mbështesë nismën arabe”, e cila përcakton krijimin e një shteti palestinez në Bregun Perëndimor dhe Rripin e Gazës, duke theksuar, “Ne duhet t’i japim fund luftës në Gaza, por askush nuk foli shumë për Bregun Perëndimor.”
Deklaratat e Borrell vijnë pas refuzimit nga ana e kryeministrit izraelit Benjamin Netanyahu të një plani për njohjen ndërkombëtare të një shteti palestinez, raporteve për një nismë të tillë të raportuar nga Washington Post dhe bisedimeve – sipas gazetës amerikane – se administrata e Presidentit Joe Biden dhe një grup i vogël vendesh arabe po punojnë për të “përgatitur një plan gjithëpërfshirës për paqe të qëndrueshme midis Izraelit dhe palestinezëve.
