Ministri i Punëve të Jashtme të Turqisë, Mevlüt Çavuşoğlu u takua në Romë me zëvendëskryeministrin dhe ministrin e Jashtëm të Italisë, Antonio Tajani, transmeton Anadolu Agency (AA).
Ministri Çavuşoğlu, i cili ishte në Romë për të marrë pjesë në Forumin e 8-të të Dialogut Mesdhetar MED, të organizuar nga Ministria e Jashtme e Italisë dhe Instituti për Studime Politike Ndërkombëtare (ISPI), u takua me homologun e tij italian.
“Diskutuam për zhvillimet në Ukrainë dhe Libi, bashkëpunimin tonë ekonomik dhe të industrisë së mbrojtjes me ministrin e Jashtëm italian, me të cilin e takuam në Romë”, shkroi Çavuşoğlu në llogarinë e tij në Twitter.
Sipas informacioneve të marra nga burime diplomatike lidhur me takimin e dy ministrave, takimi ka zgjatur rreth gjysmë ore ndërsa Çavuşoğlu ka uruar Tajanin për detyrën e re.
Çavuşoğlu i përcolli ngushëllimet e Turqisë për viktimat në rrëshqitjet e dheut në Ischia dhe shprehu keqardhjen që automjeti i një diplomati italian u dogj sot në Greqi.
Tajani përcolli urimet e tij për Turqinë për Marrëveshjen e grurit të Istanbulit.
Gjatë takimit u diskutua në detaje për Ukrainën dhe Libinë si dhe u diskutua për bashkëpunimin në luftën kundër terrorizmit dhe bashkëpunimin në industrinë e mbrojtjes.
Tajani sugjeroi mbajtjen e një takimi të këshillit të biznesit midis dy vendeve në vitin 2023.
