Një delegacion nga blloku rajonal i Afrikës Perëndimore, i kryesuar nga ish-kreu i shtetit të Nigerisë, gjenerali Abdulsalami Abubakar, është takuar për herë të parë, të shtunën, me udhëheqësin e juntës së Nigerit.
Abubakar ka zhvilluar takim të ndarë me gjeneralin Abdourahmane Tchiani, kreun e juntës e më pas edhe me presidentin e rrëzuar të vendit, Mohamed Bazoum.
Takimet qenë vazhdimësi e përpjekjeve të përfaqësuesit special të OKB-së për Afrikën Perëndimore dhe Sahelin, Leonardo Santos Simao, për pajtim.
Të shtunën vonë, kreu i juntës, Tchiani ka thënë se junta do ta kthejë vendin në sundim civil brenda tri vjetëve. Ai nuk dha detaje mbi planin, por vetëm ka thënë se parimet e tranzicionit do të vendoseshin brenda 30 ditëve në një dialog që do të organizohej nga junta. Ushtarët kryengritës në Niger janë nën presionin e sanksioneve rajonale pasi ata po refuzojnë të lirojnë dhe rikthejnë në detyrë presidentin e vendit, të cilin e rrëzuan gati një muaj më parë, derisa kishin frikë nga sulmet nga Franca, bëri të ditur një zyrtar.
