Presidenti i Turqisë, Recep Tayyip Erdoğan, ka deklaruar se Izraeli dhe mbështetësit e tij janë përgjegjës për çdo person që ka vdekur në Rripin e Gazës për shkak të mungesës së madhe të ushqimit, ujit dhe ilaçeve, raporton Anadolu.
“Përgjegjësia për çdo person të pafajshëm që vdes në Gaza për shkak të urisë, etjes ose mungesës së ilaçeve bie mbi Izraelin dhe mbështetësit e tij”, tha presidenti Erdoğan në konferencën e përbashkët për media në Ankara me homologun e tij egjiptian, Abdel Fattah el-Sisi.
Erdoğan theksoi se takimi me homologun e tij egjiptian u fokusua edhe në situatën aktuale në Palestinë, si dhe përsëriti se prioriteti kryesor është përfundimi i “gjenocidit të vazhdueshëm” prej 11 muajsh dhe vendosjen e një armëpushimit të qëndrueshëm, së bashku me sigurimin e rrjedhës së pandërprerë të ndihmave humanitare.
Duke përmendur se 32 për qind e ndihmave totale të dërguara në Gaza deri më tani vijnë nga Turqia, Erdoğan falënderoi autoritetet egjiptiane, veçanërisht Gjysmëhënën e Kuqe Egjiptiane, të cilët kanë bashkëpunuar me Gjysmëhënën e Kuqe Turke dhe Agjencinë e Ndihmës dhe Fatkeqësive të Turqisë (AFAD) në dërgimin e ndihmave në Gaza.
“Duke penguar dërgimin e ndihmave humanitare, administrata izraelite shton një tjetër krim në listën e saj. Ajo përpiqet të thyejë frymën e rezistencës së popullit palestinez, që nuk mundi ta thyejë mijëra tonë bomba, duke i dënuar me uri dhe etje”, tha Erdoğan.
Erdoğan theksoi se “fajtorët” që qëndrojnë pas vdekjes së 41 mijë njerëzve në Gaza duhet të qëndrojnë në sallat e gjyqit, jo në podiumet e kongresit.
Duke theksuar se Egjipti, Katari dhe SHBA po ndërmjetësojnë bisedimet e armëpushimit, Erdoğan tha se Turqia po e mbështet këtë proces nëpërmjet Ministrisë së Punëve të Jashtme të Turqisë dhe Organizatës Kombëtare të Inteligjencës.
Presidenti turk theksoi se Tel Avivi ka mbajtur një qëndrim “pa kompromis dhe bllokues” në bisedimet e armëpushimit të Gazës me grupet palestineze.
Duke iu referuar vrasjes së kreut të byrosë politike të grupit të rezistencës Hamas, Ismail Haniyeh, Erdoğan tha se Tel Avivi tregoi mentalitetin e tij duke vrarë personin me të cilin po negocionte një armëpushim.
Ai më tej tha se Ankara dhe Kajro kanë qëndrim të unifikuar për çështjen palestineze, duke shtuar se kontributet e tyre për paqen dhe stabilitetin rajonal janë “jetike”.
Ai po ashtu kujtoi se Ankaraja ka vazhduar të bëjë gjithçka që është e mundur për të rritur presionin ndaj Tel Avivit dhe se Turqia paraqiti zyrtarisht kërkesën e saj për ndërhyrje në çështjen e gjenocidit të paraqitur nga Afrika e Jugut në Gjykatën Ndërkombëtare të Drejtësisë.
“Ne po intensifikojmë gjithashtu përpjekjet tona për të siguruar që zyrtarët izraelitë që kanë kryer krime në Gaza të mbahen përgjegjës në gjykatat ndërkombëtare”, theksoi ai.
Duke deklaruar se Ankaraja vazhdon t’i kujtojë komunitetit global përgjegjësitë e saj, Erdoğan akuzoi disa vende se ende mbështesin pa kushte Izraelin, duke u bërë kështu bashkëfajtorë në krimet që po kryhen.
“Asnjë hap parandalues nuk po ndërmerret për të ndalur politikën e masakrës së qeverisë, e cila kërcënon jo vetëm rajonin, por gjithë botën”, shtoi ai.
Ai përsëriti thirrjen e tij për një “korrigjim të shpejtë të gabimeve dhe për të qenë në anën e duhur të historisë”.
“Të parandalohet Izraeli nga tërheqja e rajonit tonë në tensione të mëtejshme mund të arrihet vetëm duke braktisur politikat ambivalente”, tha presidenti Erdoğan.
“Turqia dhe Egjipti përforcojnë bashkëpunimin në sektor të ndryshëm, synojnë 15 miliardë dollarë vëllim tregtar”
Më tej, presidenti Erdoğan foli edhe për marrëdhëniet Turqi-Egjipt, duke theksuar se Ankaraja po përparon me vendosmëri drejt qëllimit të saj për të rritur vëllimin e tregtisë me Kajron në 15 miliardë dollarë brenda pesë viteve të ardhshme.
Erdoğan tha se Turqia dhe Egjipti riafirmuan me vendosmëri për të avancuar bashkëpunimin në çdo fushë, duke përfshirë industrinë, mbrojtjen, shëndetin, mjedisin dhe energjinë. Ai tha se bashkëpunimi tregtar dhe ekonomik përbëjnë dimensionin më të fortë të partneritetit midis dy vendeve.
“Gjatë 10 viteve të fundit, ne kemi vazhduar të jemi ndër pesë partnerët kryesor tregtar të Egjiptit. Ne po përparojmë me vendosmëri drejt qëllimit tonë për të rritur vëllimin tonë të tregtisë në 15 miliardë dollarë brenda 5 viteve të ardhshme”, tha Erdoğan.
Presidenti turk gjithashtu theksoi kontributet e rëndësishme të biznesmenëve turq në ekonominë egjiptiane, me investime afër 3 miliardë dollarë. Ai u kërkoi sipërmarrësve turq të zgjerojnë më tej investimet e tyre dhe të ftojnë investitorët egjiptianë në Turqi.
“Ne do të përmirësojmë marrëdhëniet tona të shumëanshme në një mënyrë të favorshme”, tha ai.
Më tej, Erdoğan gjithashtu kujtoi se vitin e ardhshëm dy vendet do të festojnë 100-vjetorin e vendosjes së marrëdhënieve të tyre diplomatike.
“Ne jemi dy vende të lashta që kanë qenë djepe të qytetërimeve që formësuan historinë njerëzore. Ne i forcojmë vazhdimisht marrëdhëniet e thella dhe të shumëanshme mes vendeve tona përmes përpjekjeve tona të përbashkëta”, tha Erdoğan.
Presidenti egjiptian mbërriti sot për një vizitë zyrtare në Turqi me ftesë nga presidenti turk, e para e tij që nga marrja e detyrës.
Presidenti egjiptian: Vizita në Turqi “hap rrugën për një fazë të re” në marrëdhëniet tona
Presidenti el-Sisi, nga ana e tij, tha se vizita e tij në Turqi hap rrugën për një fazë të re në marrëdhëniet turko-egjiptiane, raporton Anadolu.
“Vizita ime në Turqia hap rrugën për një fazë të re në marrëdhëniet ekonomike dhe tregtare”, tha el-Sisi.
“Ne kemi qenë dëshmitarë të një rritje të komunikimit midis dy kombeve në vitet e fundit”, tha ai.
Presidenti egjiptian po ashtu përshëndeti përpjekjet e afrimit midis Turqisë dhe Sirisë që, siç tha ai, synojnë “arritjen e një zgjidhjeje politike dhe lehtësim të vuajtjeve të popullit sirian në përputhje me rezolutat e Këshillit të Sigurimit të OKB-së”.
Siç tha el-Sisi, Egjipti dhe Turqia ndajnë një qëndrim të fortë për “domosdoshmërinë e arritjes së armëpushimit në Gaza dhe dhënies fund të agresionit izraelit në Bregun Perëndimor”.
“Diskutimet tona u ndalën në mënyrat për të trajtuar tragjedinë humanitare që palestinezët po durojnë në Gaza”, tha ai.
Izraeli ka nisur një ofensivë brutale në Rripin e Gazës pas sulmit të Hamasit të 7 tetorit, duke vrarë të paktën 40.800 palestinezë, kryesisht gra dhe fëmijë, si dhe duke plagosur afër 94.400 të tjerë.
Javën e kaluar, ushtria izraelite gjithashtu nisi operacionin e saj më të madh ushtarak në Bregun Perëndimor verior në dy dekada, duke vrarë të paktën 33 persona dhe duke shkaktuar shkatërrime masive në zonë.
Presidenti egjiptian mbërriti në Ankara sot për një vizitë zyrtare me ftesë të presidentit turk.
