Finlanda ka vendosur t’i bashkohet nismës së Francës për parandalimin bërthamor, e cila është e rëndësishme për sigurinë në Evropë, njoftoi të hënën Ministria finlandeze e Mbrojtjes, transmeton Anadolu.
“Nisma është një formë bashkëpunimi dypalësh mes Finlandës dhe Francës”, tha ministria në një deklaratë, duke theksuar se të dyja vendet e kanë diskutuar nismën si në nivelin më të lartë politik, ashtu edhe në nivelin e zyrtarëve.
Në mars 2026, presidenti francez, Emmanuel Macron, nisi një nismë për dimensionin evropian të parandalimit bërthamor të Francës. Në atë kohë u njoftua se tetë vende i ishin bashkuar nismës, të cilave më vonë iu bashkua edhe Norvegjia.
“Nisma franceze do të forcojë qasjen gjithnjë e më aktive të Evropës ndaj mbrojtjes. Objektivi i saj është forcimi i sigurisë dhe parandalimit në të gjithë Evropën”, tha ministri finlandez i Mbrojtjes, Antti Hakkanen.
Duke theksuar se nisma franceze nuk zëvendëson dhe as mbivendoset me parandalimin bërthamor të NATO-s, deklarata kujtoi se parandalimi bërthamor i NATO-s bazohet në marrëveshjet për ndarjen e armëve bërthamore dhe mbështetet në garancinë e zgjeruar amerikane.
“Kjo është në fund të fundit garancia supreme e sigurisë së Aleancës”, shtoi ajo.
Edhe presidenti finlandez, Alexander Stubb, konfirmoi se nisma nuk e zëvendëson parandalimin e NATO-s, duke shtuar se pika kryesore e nisjes për Finlandën është veprimi si pjesë e NATO-s dhe BE-së.
“Finlanda nuk synon të vendosë armë bërthamore në territorin e saj në kohë paqeje”, tha ai.
