Gazetari dhe komentatori pro-palestinez Sami Hamdi do të kthehet në shtëpi pas më shumë se dy javësh paraburgim nga autoritetet e emigracionit të SHBA-së (ICE), njoftuan avokatët dhe bashkëshortja e tij të hënën.
Hamdi, 35 vjeç, u ndalua më 26 tetor në aeroportin ndërkombëtar të San Franciskos gjatë një turi ligjëratash mbi luftën e Izraelit në Gaza. Avokatët e tij thanë se ai u dënua për qëndrimet kritike ndaj Izraelit, ndërsa akuza zyrtare ishte vetëm për tejkalim vize, e cila u revokua papritur dhe pa arsye.
“Sami nuk duhej të kalonte asnjë natë në qeli. Faji i tij i vetëm ishte që foli qartë për krimet e luftës së Izraelit ndaj palestinezëve,” tha Hussam Ayloush nga Këshilli për Marrëdhënie Amerikano-Islame (CAIR).
Bashkëshortja e tij, Soumaya Hamdi, reagoi me gëzim në rrjetet sociale:
“Sami po kthehet në shtëpi, elhamdulilah. Nuk mund ta përshkruaj dot gëzimin.”
Rasti i tij ka ngritur shqetësime për lirinë e shprehjes në SHBA, ndërsa universitete dhe organizata si SOAS dhe PEN America dënuan trajtimin e tij.
Ndërkohë, aktivistja e djathtë Laura Loomer e përshëndeti ndalimin e Hamdit dhe e akuzoi atë për mbështetje të terrorizmit, pa ofruar asnjë provë.
Sipas babait të tij, Mohamed El-Hachmi Hamdi, i biri nuk ka lidhje me asnjë grup politik apo fetar, por mbron të drejtën e popullit palestinez për paqe, siguri dhe dinjitet.
Ngjarja ndodh në një kohë kur administrata amerikane përballet me kritika për presion ndaj zërave pro-palestinezë, ndërsa lufta e Izraelit në Gaza ka shkaktuar mbi 68 mijë viktima palestineze që nga tetori i vitit 2023. /mesazhi
