Kongresistja progresive amerikane Ilhan Omar ka reaguar ashpër ndaj presidentit Donald Trump, pasi ky i fundit e quajti atë dhe emigrantët somalezë “mbeturina” gjatë një mbledhjeje të kabinetit.
Trump, i cili ka ashpërsuar retorikën kundër emigracionit pas vrasjes së dy pjesëtarëve të Gardës Kombëtare në Washington muajin e kaluar, akuzoi komunitetin somalez në Minnesota se “nuk kontribuon” dhe “vetëm ankohet”.
“Fiksimi i tij ndaj meje është i çuditshëm,” shkroi Omar në rrjetet sociale. “Shpresoj të marrë ndihmën që i duhet.”
Omar, e cila erdhi në SHBA si refugjate nga lufta civile në Somali dhe është anëtarja e parë e Kongresit me prejardhje somaleze, përfaqëson një distrikt me një nga komunitetet më të mëdha somaleze në vend.
Ndërkohë, një raport i Dhomës së Tregtisë së Minnesotës në vitin 2021 theksonte përmirësime të dukshme në punësim, të ardhura dhe arsimim brenda komunitetit somalez.
Megjithatë, Trump ka vendosur masa të reja të ashpra, përfshirë pezullimin e migracionit nga vendet e “botës së tretë” dhe rishikimin e statusit të banorëve të përhershëm nga 19 vende. Ai ka ribërë gjithashtu sulmet e mëparshme ndaj komunitetit somalez, përfshirë ato lidhur me skandale të epokës COVID.
Grupi progresiv “Justice Democrats” e cilësoi fushatën e Trump ndaj Omarit dhe komunitetit somalez si “jashtëzakonisht raciste”, duke e akuzuar presidentin se po nxit urrejtje për të shmangur vëmendjen nga dështimet e administratës së tij. /mesazhi
