Forcat Ajrore Indiane tha të martën se qeveria kishte shkarkuar tre oficerë për gjuajtjen aksidentale të një rakete në Pakistan në mars, një incident që dy rivalët e armatosur bërthamor e trajtuan me qetësi pasi nuk pati viktima.
Ekspertët ushtarakë kanë paralajmëruar në të kaluarën për rrezikun e aksidenteve ose llogaritjet e gabuara nga fqinjët, të cilët kanë zhvilluar tre luftëra dhe janë përfshirë në përleshje të shumta të armatosura më të vogla, zakonisht mbi territorin e diskutueshëm të Kashmirit, shkruan CNN.
Raketa BrahMos, një raketë lundrimi me aftësi bërthamore, e zhvilluar bashkërisht nga Rusia dhe India, u lëshua më 9 mars, duke bërë që Pakistani të kërkonte përgjigje nga Nju Delhi mbi mekanizmat e sigurisë në vend për të parandaluar lëshimet aksidentale.
“Një Gjykatë Hetimore, e ngritur për të vërtetuar faktet e çështjes, zbuloi se devijimi nga procedurat standarde të funksionimit nga tre oficerë çoi në shkrepjen aksidentale të raketës”, thanë forcat ajrore në një deklaratë.
Më tej në deklaratë thuhet se qeveria kishte shkarkuar tre oficerët me efekt të menjëhershëm të martën.
Sipas Shoqatës së Kontrollit të Armëve me bazë në SHBA, rrezja veprimi i raketës BrahMos është midis 300 kilometra (186 milje) dhe 500 kilometra (310 milje), duke e bërë atë të aftë të godasë kryeqytetin e Pakistanit, Islamabad nga një platformë lëshimi indiane veriore. /euronews
