Studentet që nuk respektojnë rregullin e detyrueshëm të shamisë në universitete dhe shkolla të mesme në Iran, nuk do të mund të shkollohen, transmeton Anadolu.
Sipas medias iraniane, Ministria e Shkencës, Kërkimit dhe Teknologjisë, me të cilën janë të lidhura institucionet e arsimit të lartë dhe Ministria e Arsimit Kombëtar kanë lëshuar njoftime të veçanta për këtë temë.
Në njoftimin e të dyja ministrive thuhet se studentet që nuk respektojnë ligjin e mbulesës nuk do të mund të marrin mësim.
– Protestat në Iran dhe rregulli i hixhabit
Protestat shpërthyen në të gjithë vendin në shtator të vitit të kaluar në Iran, kur 22-vjeçarja Mahsa Amini vdiq pasi u ndalua nga “Policia e moralit”.
Gjatë protestave, sërish erdhën në rend dite kërkesat për lehtësimin e ligjit të detyrueshëm të shamisë, i cili zbatohet që nga viti 1979.
Pas protestave që zgjatën për rreth 4 muaj, ka kritika për faktin se gratë nuk respektojnë rregullat e detyrueshme të shamisë në disa qytete.
Përderisa në rrjetet sociale shihet se disa gra në vend po ecin pa shami në rrugë dhe vende pune, konservatorët pro-regjimit, të shqetësuar nga kjo situatë u bëjnë thirrje autoriteteve të zbatojnë rregullat.