Irani ka uruar Arabinë Saudite me rastin e Ditës Kombëtare të mbretërisë, në vazhdën e një përafrimi mes dy rivalëve rajonalë, transmeton Anadolu.
Në letra të veçanta drejtuar mbretit saudit Salman bin Abdulaziz dhe princit të kurorës Mohammad bin Salman, presidenti iranian Ebrahim Raisi përshëndeti vendin arab, njoftoi zyra e tij.
Ambasada iraniane në kryeqytetin saudit, Riad, i publikoi dy letrat në rrjetet sociale.
Në një deklaratë të veçantë, Ministria e Jashtme iraniane shprehu gjithashtu “urimet dhe bekimet e saj të sinqerta për udhëheqjen dhe popullin” e Mbretërisë së Arabisë Saudite.
“Forcimi dhe konsolidimi i marrëdhënieve mes dy vendeve në kuadër të politikës së fqinjësisë dhe bashkëpunimit rajonal ofron mundësi të vlefshme dhe premtuese për të arritur prosperitet më të madh për të gjitha vendet e rajonit”, thuhet në deklaratë.
Festuar më 23 shtator çdo vit, Dita Kombëtare e Arabisë Saudite shënon bashkimin dhe riemërtimin e Mbretërisë së Nexhdit dhe Hexhazit me emrin e ri, Mbretëria e Arabisë Saudite, në vitin 1932.
Irani dhe Arabia Saudite rivendosën lidhjet e tyre diplomatike në mars të këtij viti, pas shtatë vjetësh, pas negociatave maratonë për përmirësimin e marrëdhënieve të organizuara nga Iraku, Omani dhe Kina.
Dy fqinjët ndërprenë marrëdhëniet diplomatike në janar 2016 pasi Ambasada saudite në Teheran dhe konsullata në Mashhad u sulmuan nga turma pas ekzekutimit të një kleriku shiit saudit.
Ambasadori i ri i Arabisë Saudite në Teheran, Abdullah bin Saud Al-Anzi, i dorëzoi kredencialet e tij ministrit të Jashtëm iranian Hossein Amir-Abdollahian në fillim të këtij muaji dhe zyrtarisht mori përsipër detyrën.
Një javë para kësaj, ambasadori i ri i Iranit në Arabinë Saudite Alireza Enayati i dorëzoi gjithashtu letrat kredenciale drejtorit të përgjithshëm të Ministrisë së Jashtme saudite, Abdul Majid al-Sameri.
Mbreti saudit Salman e ka ftuar Raisin të vizitojë Riadin dhe Irani gjithashtu i ka bërë një ftesë monarkut për të vizituar Teheranin.
Javën e kaluar, klubet më të mira të futbollit të dy vendeve, Al-Nassr dhe Persepolis, luajtën një ndeshje në Ligën e Kampionëve të AFC-së në stadiumin Azadi të Teheranit pas shumë vjetësh.
