Ministri izraelit i Mbrojtjes, Yoav Gallant deklaroi se do të përdorin forcën kundër raketave të lëshuara nga Rripi i Gazës së bllokuar nga Izraeli, transmeton Anadolu.
Në një deklaratë me shkrim ministri Gallant njoftoi se “Forcat Ajrore izraelite shkatërruan objektet e prodhimit të armëve dhe magazinat e Hamasit në një operacion të kryer gjatë natës”.
“Çdo përpjekje për të dëmtuar qytetarët tanë do të përballet me forcën e plotë të ushtrisë izraelite”, tha Gallant.
Ushtria izraelite njoftoi se në sulmin e saj ajror në pjesën qendrore të Gazës gjatë natës, goditi zonat ku prodhohen kimikatet e përdorura nga Hamasi për prodhimin e raketave dhe armëve.
Agjencia zyrtare palestineze (WAFA) njoftoi se një zjarr ka shpërthyer në një zonë të shënjestruar nga avionët luftarakë izraelitë dhe se vendbanimet civile aty pranë janë dëmtuar.
Në një deklaratë dje nga ushtria izraelite, u raportua se një raketë u lëshua nga Gaza dhe u neutralizua nga sistemet e mbrojtjes ajrore izraelite.
