Juria e madhe e Georgias të hënën vonë ktheu aktakuzën prej 41 pikash kundër ish-presidentit amerikan, Donald Trump dhe 18 aleatëve të tij politikë mbi akuzat në lidhje me përpjekjet e dyshuara për të përmbysur rezultatet e zgjedhjeve 2020, raporton Anadolu.
Aktakuzat u ngritën pasi juria e madhe dëgjoi dëshmitë e dëshmitarëve, përfshirë ish-guvernatorin Geoff Duncan dhe pas vlerësimit të provave nga prokurorët.
Trump deri më tani është paditur katër herë në gjykatat shtetërore dhe federale që kur u largua nga detyra. Akuzat variojnë nga pagesat e parave të fshehura për një yll filmi për të rritur, përpjekjet për të përmbysur rezultatet e zgjedhjeve kombëtare, deri te mbajtja e paligjshme e dokumenteve të klasifikuara dhe përpjekjet për të parandaluar hetuesit të kryejnë detyrat e tyre.
Trump u akuzua në Georgia të hënën me 13 akuza penale, duke përfshirë shkelje të Aktit të Organizatave të Ndikuara nga Mashtruesit dhe të Korruptuarit e Shtetit të Georgias (RICO), nxitje për shkelje të betimit nga një zyrtarë publik, komplot për prezantim të rremë nga një zyrtar publik dhe komplot për të kryer deklarata të rreme ndër krime të tjera.
Akti RICO dhe versionet shtetërore të ligjit fillimisht u krijuan për të goditur krimin e organizuar, por që atëherë janë zgjeruar për të përfshirë sipërmarrje të tjera kriminale që përfshijnë individë të shumtë.
Aktakuza e gjerë prej 98 faqesh thotë se Trump dhe të pandehurit e tjerë, duke përfshirë avokatin personal Rudy Giuliani, ish-shefin e kabinetit Mark Meadows, avokatët Sidney Powell dhe John Eastman dhe të tjerë, “përbënin një organizatë kriminale anëtarët dhe bashkëpunëtorët e së cilës janë përfshirë në aktivitete të ndryshme kriminale”.
Kjo përfshin shumë nga akuzat e ngritura kundër Trump si dhe krime të tjera, duke përfshirë dhënien e deklaratave të rreme, falsifikimin, paraqitjen e dokumenteve të rreme, ndikimin e dëshmitarëve, vjedhjen e kompjuterit, qasje pa leje në kompjuter, shkelje e privatësisë kompjuterike, komplot për të mashtruar shtetin, akte që përfshijnë vjedhje dhe dëshmi e rreme, sipas aktakuzës.
Janë edhe 30 bashkëpunëtorë të pa akuzuar.
Çështja kundër Trumpit dhe bashkëpunëtorëve të tij erdhi pas hetimeve dyvjeçare të udhëhequr nga Prokurori i Qarkut Fulton, Fani Willis.
Hetimi i Willis u motivua nga telefonata e 2 janarit 2021 që Trump i bëri Sekretarit të Shtetit të Georgias, Brad Raffensperger, në të cilën ai i kërkoi zyrtarit të lartë shtetëror të “gjente 11.780 vota”, numri që do t’i duhej për të fituar betejën e shtetit, kurse regjistrimi i telefonatës më vonë rrodhi në shtyp.
Hetimi i Willis përfshiu gjithashtu një hetim ndaj votuesve lokalë të rremë që u përpoqën të vërtetonin rezultatet e manipuluara zgjedhore në favor të Trumpit.
Fitorja e Presidentit Joe Biden në shtetin jugor u konfirmua pas dy rinumërimeve që u pasuan nga guvernatori republikan i shtetit, Brian Kemp, duke nënshkruar përfundimisht rezultatet pavarësisht kundërshtimeve të ashpra publike të Trumpit.
Edhe përpara hapjes zyrtare të aktakuzave, Trump nisi fushatën kundër Willis, siç e ka bërë vazhdimisht ish-presidenti amerikan në të kaluarën, duke e quajtur atë “një mbështetëse e tërbuar që bën fushatë dhe mbledh fonde në një platformë për të ndjekur penalisht Presidentin Trump përmes këtyre aktakuzave false”.
“Koha e kësaj goditjeje të fundit të koordinuar nga një prokuror i njëanshëm në një juridiksion me shumicë dërrmuese demokrate jo vetëm që tradhton besimin e popullit amerikan, por gjithashtu ekspozon edhe motivimin e vërtetë pas akuzave të tyre të sajuara”, thuhet në deklaratën e fushatës.
