Një kanal televiziv i Danimarkës kërkoi falje në Twitter për publikimin e komentit i cili përngjasonte lojtarët e kombëtares së Marokut dhe familjet e tyre me “familjen e majmunëve”, transmeton Anadolu Agency (AA).
Komenti i prezantuesit të TV 2 News, Christian Hogh Andersen shkaktoi kritika pasi ai bëri komentin gjatë kalimit në lajmin e familjes së majmunëve që do të jepej pas pamjeve të lojtarëve marokenë që festuan dhe u përqafuan me nënat e tyre pas fitores së ndeshjes në Kupën e Botës FIFA 2022.
Andersen kishte bërë prezantimin e lajmit të dytë me komentin “Në vazhdim të lajmit për lojtarët marokenë dhe familjet e tyre në Katar, kemi edhe lajmin për një familje kafshësh që u bashkuan për të t‘u ngrohur”.
TV 2 News, lidhur me ngjarjen bëri një deklaratë nga llogaria e saj në Twitter ku tha: “Shprehim jashtëzakonisht keqardhje për komentet që lidhen me lajmin e mëpasshëm lidhur me kafshët. Për këtë kërkojmë falje”.
Kryeredaktorja e TV 2 News, Anne Mette Svane pranoi se komenti është “i gabuar dhe agresiv”.
Andersen kërkoi falje duke thënë se “nuk e ka bërë krahasimin me qëllim të keq”.
