Pakistani dëshiron të rrisë bashkëpunimin e tij me Rusinë në një numër fushash, veçanërisht energjinë, tregtinë dhe investimet, ka thënë kryeministri Shehbaz Sharif, transmeton Anadolu.
Gjatë një takimi me ambasadorin rus në Pakistan Albert P. Khorev të premten, kryeministri Sharif ka shprehur gjithashtu ngushëllime të thella për humbjen e jetëve në sulmin terrorist të javës së kaluar, duke thënë se Islamabadi qëndron në solidaritet me Moskën në këtë kohë tragjike.
Persona të armatosur më 22 mars hapën zjarr ndaj njerëzve në një sallë koncertesh në Krasnogorsk në rajonin e Moskës. Të paktën 144 persona vdiqën dhe katër persona u akuzuan për terrorizëm.
“Duke vënë në dukje lidhjet historike të përzemërta midis dy vendeve, kryeministri tha se Pakistani dëshiron të rrisë bashkëpunimin dypalësh me Rusinë në një numër fushash, veçanërisht në energji, tregti dhe investime”, thuhet në një deklaratë nga zyra e kryeministrit në Islamabad.
Sharif i ka kërkuar palës ruse të dërgojë një delegacion në Pakistan për të zhvilluar diskutime me homologët e tyre për të gjetur mënyra për të nxitur lidhjet tregtare dhe investimet midis dy vendeve.
Ai ka përsëritur ftesën e tij për presidentin rus Vladimir Putin për të bërë një vizitë zyrtare në Pakistan sa më shpejt që të jetë e mundur, thuhet në njoftim.
